Por máis que amenta, manipule, especule e insulte non ten predicamento na parroquia e o tempo está a colocarlle no lugar que se merece. O seu discurso cerril e ignorante está a levarlle a usar como argumentos recentes o que en textos seus anteriores eran unha aberración; por exemplo, o que antes era un galeguismo destrutor é agora necesario para apelar á Galicia que é real. Algo si se mantén constante: o discurso de que a entrega do territorio público e comunitario a mans privadas expoliadoras, faranos libres, prósperos e mellores, dá igual que estas mans sexan as das enerxéticas e as súas acólitos da maquinaria eólica, as dos contaminadores de Alcoa ou agora os de Altri, e os que están por vir. Pois ben, como dixo Abraham Lincoln “poderás enganar a todos durante algún tempo, poderás enganar a alguén sempre, pero non poderás enganar sempre a todos”.

Utilizando palabras como “progreso e desenvolvemento”, busca mobilizar sensibilidades cara a onde? a apoiar que?. O progreso e desenvolvemento que as persoas defensoras do territorio queremos pasa en primeiro lugar porque non nolo arrebaten e ata o de agora todos e cada un dos proxectos industriais ou enerxéticos tan defendidos por vostede e o sindicato CCOO que lle paga –aínda que non sabemos se son os únicos-, ten como base esencial o espolio do territorio; ou é que cre que nos engana co mesmo discurso demagóxico da industria das renovables? seica cre que as persoas afectadas non coñecemos o risco dos máis que esaxerados perímetros poligonales dos proxectados parques eólicos?. O progreso e desenvolvemento que pretendemos non pasa por esixir de maneira constante diñeiro ás administracións para asegurar a viabilidade das empresas e tampouco pasa por dicir que se non o dan, o proxecto non se fai; nós vimos ofrecendo datos rigorosos, informes técnicos e información sobre inxección de diñeiro público a empresas privadas desde fai máis dunha década seica un líder sindical pode ter un discurso sobre progreso e desenvolvemento sen achegar nin un só dato, só insultando a quen non pensan como el? Os e as traballadoras merécense líderes propositivos e con ideas e non ao rebufo do discurso dos empresarios, merécense un futuro diferente e máis digno do que vostede defende. Só existen desde CCOO propostas destrutivas da terra e a contorna, viables unicamente con diñeiro público e que son extractivistas? Pois, adiantámoslle que seguiremos enfronte.

O progreso e desenvolvemento que as defensoras do territorio queremos pasa por tomar as mellores decisións nas nosas comunidades porque vivimos aquí: non queremos proxectos contaminantes, expoliadores de terra e auga, que alenten e promovan o consumo sen fin, que precaricen as condicións de vida dos habitantes dos territorios e sométannos ás decisións empresariais, que expoñan especies á extinción, que destrúan o patrimonio histórico, que acaben coa paisaxe cotiá, que hipotequen o futuro real dos nosos fillos e fillas. Defendemos postos de traballo que non danen, hipotequen ou escravicen ás persoas e que sexan dignos, seguros e estables. Defendemos os bens públicos globais, porque son bens e xeran valor e riqueza, porque son públicos, perténcennos a todos e non aos especuladores e esixen redistribución e globais porque- ademais de transcender mentalidades curtas como a súa-, son indisolubles da humanidade e a súa supervivencia.